Un sabo de canpagna

Ea toseta

ea vien dai canpi

co cala el sole

co ‘na fassina de fen soea schina

e do fioreti in man,

parchè ea xe abituà farlo,

e ea pensa a doman che xe festa,

metarsei sol peto e sui cavei.

Sentà coe vissine

sui scaini de casa ea vecieta

ciapa i ultimi ragi de sole,

paciolando e fasendo comarò

ghe vien in mente coea gera zovane

e no ea vedeva l’ora che vegnesse festa

par balar, grasiosa e alegra

coi amissi zovani come ea.

Za ea luce se fa fiapa

e cresse e ombre che vien zo

dai monti e dai cuerti,

pena sciarà daea luna che se alsa.

Ea canpana bate cualche toco

come dirte che doman xe festa

ea toseta se rilassa anca el core

daea contentessa.

I tosi ramenghi, sigando

paea piassa corendo in ciapo,

i salti, i ride e i fa un casoto.

Soeto va casa el bifolco

fis-ciando e pensando che finalmente

doman xe festa anca par lu.

Intanto, pianeto i ciareti

va via e anca i rumori ghe moea.

Solo el marangon lavora,

sarà dentro botega

el poe darghe de marteo e de sega,

par finire el lavoreto chel ga scominsià.

Serto che el sabo xe el giorno più beo

parchè te pensi che doman

no te lavori.

Invesse el giorno dopo, che barba

star  sensa far gnente, te te stufarè

cussì tanto da no vedar l’ora

che vegna presto el luni.

Eh! Boceta schersoso

purtropo passa presto el tenpo

e te te trovarè cussì de boto

vecio e stufo e prega el Signore

che la te vaga anca ben…cussì.

 

(10.2011)

(Liberamente tratto da “Il sabato del villaggio” di Giacomo Leopardi)