TE VOJO BEN

Te vojo ben
parché te sì mio,
dolse, prepotente e caro.
Parché sento el to corpo
rumegare tuto tacà de mi.
Te vojo ben
parché te me ghe scuasi sgrafà ła pełe
sensa voere ma co tanta passion,
dispetoso, bałarin, dolse bestion.
Te vojo ben
parché so che no te me toi in giro
e te serchi invesse de scondare
co ‘na tenara bianca finsion
el to amore par mi.
Te vojo ben
pa’ i to oci
bei e sognanti,
che amorevolmente i me varda.
Te vojo ben
pa ‘ła to voze
dełe volte aspra e bramosa,
altre volte dolse come el miełe,
che ‘riva ae me rece
drite e ‘tente.
Altri sbavosi rivałi voria ciapare
el to posto
nel me core,
ma mi vojo ben soło a ti.
Te vojo ben
da senpre
e par senpre sarà.
Purtropo ła to vita
sarà più corta dea mia
e gnente posso farghe.
Te vojo ben
parché posso cocołarte
e sentire e to caresse sol me viso
mentre co’ła testina te te strussi
dosso el me pèto gajardo.
Te vojo ben
parché te me fe ridare
co te me cori drio gnaolando
come a dirme
che te ghe da magnare.
Te vojo ben
nevrastenico Pippi
micio mio beissimo,
parché te me de tanto
no te me toi gnente
e te sì tuto e solo par mi.

Ceronte