POE SEMPRE SERVIRE

‘Na matina me sò svejà beło riposà co’ idee ciare e tanta voja de fare. Ma tanta de cueła voja che me sò dito: “uncò meto a posto el sgabussin ch’ el xe strapìen e che xe tanto tempo che rimando, scarto un poca de roba e meto in ordine cueła che resta”. Pare ‘na decision da gnente ma chi che ga provà sa cossa vol dire!

Scominsio dal’alto.Tiro sò e vaìse e łe meto da parte, ciapo in man dełe cufie par scoltare ła radio e sicome che ghe no do pari łe poso par tera e dopo una ła scartarò. Po’ toca ai feri da stiro: gò cueło normałe cioè soło ła piastra che scalda, gò cueło a vapore ch’ el buta massa poco e ghe ne n’altro da ‘giustare. Pòso anca questi par tera. Vanti cussì cò do scatoełe de cartołine ricevue da tuto el mondo; ‘na gondoła col carion deła biondina in gondoeta; un pepesałe co na bosseta sensa tapo; ‘na scatoła de svèje vecie e fora uso; scarpe sformà ma ancora bone par el bruto tempo; adiritura scatołe vode e tante altre cianfrusalie che xe mejo gnanca fare l’elenco.
Adesso vien el bèło.
Scominsio dałe vałìse. E ciapo in man una par una e meto da parte cuełe sensa rodełe par scartarle, però ogni una ga ‘na storia e un ricordo e po’ vardando ben se łe meto una dentro ł’altra e poe stare benissimo sol calto e no se sa mai… e podaria sempre servire!
Drio ałe vałìse ciapo in man uno ała volta tuto cueło che gò tirà sò e so ogni roba ghe xe un tòco de storia de ‘na vita e pò, vardando ben el scafałe, el spassio ghe xe e ałora parchè butare via?
Cussì vago vanti cò tanta fadiga a risistemare tuto come gera prima parchè me so incorto che xe tute robe che…poe sempre servire!!!! Ł’unica cosa che no xe ‘ndà al so posto gero mi che dopo na sudàda tremenda me so sentà a tirare el fià e me xe vegnù da pensare: ”Spero che anca nostro Signore el fassa come gò fato mi e col riva al me nome el ghe daga ‘na ociada el me rimeta zo pensando che se el me łassa qua un altro fià posso uncora servire!!!…e sicuramente poe servire a mi par rimetarme dei tanti sbali de ‘na vita”.

Ceronte