No so miga d’acordo co quei che dise che fin che ghe xe vita ghe xe speransa, se pri-ma no ciaremo ben cossa intendemo par vita.
Ciapemo un caso dei ultimi tenpi, sensa fare nomi che tanto fra poco capisse tuti de chi che parlo. Vuto che sia parmesso fare tuta quea caciara su ea pełe de ‘na pora fe-mena. Co ea gavudo l’incidente ea gera na bea tosa ma dopo dissete ani no ea gera più tosa e gnanca dona ma soeamente un corpo deformà, tuto roto e rinsignà che vegetava imobie! Se quea gera ‘na vita che doveva sperare senpre de star mejo mi digo sincera-mente che non go capio gnente.
Dopo ‘ver scoltà i pro e i contro ea sołussion decisa dai giudici, sensa entrare nel me-rito, tra de mi gò fato un rajonamento: El Signore me dà ea vita e quando el decide che xe ora de darghe un tajo el lo fa e BISOGNA ACETARE ea so decisiòn. Xe a sto punto che me vien ‘na gran confusiòn in testa.
Vuio vèdare se co’un esenpio me vien più fassie spiegarme e metare in ordine e idee che me gira pa’l sarveo.
Metemo el caso me capitasse un bel colpo, i ło ciama anca infarto o ictus; se ghe re-sto seco tuto finissie eà sensa problemi. Se no moro al primo boto, me trovo soeo e no posso movarme a sercare aiuto, nel giro de qualche ora al massimo go finio eo stesso e “torno aea casa del Padre” dato si che’l me ga ciamà. Se invesse go qualcun vissin che me porta in rianimassiòn, eà i me taca siringhe, cateteri, sonde, sondine e ventiatori e po i scuminsia co antibiotici, riassanti, analgesici, anticonvulsivi e siroppi vari che i ciama alimenti/idratanti e altre robe chimiche che no conosso. Aea fine i dotori sodisfati i co-munica ai parenti: ”semo rivà ‘pena in tenpo, ghemo salvà ‘na vita”. Ma quaea vita?
Qua scominsia el calvario de ore, giorni, mesi, ani e ani blocà nel leto co zente torno che te alsa, te gira, te sneta, te spuncia, te controea…e ti? Gnente, no te poi parlare, no te poi difendare ea to dignità el to pudore da tute ste atensiòn che ti no te ghe domandà e ansi se te capissi uncora calcossa, sicuramente te vorissi che i ghe moeasse e i łasasse fare ea voeontà del Signore. Ecco, questo me domando; se’l Signore non voeva farme morire ‘desso, ma dopo sinque, diese o venti ani, el colpo el me eo garia mandà co gera ea ora giusta par Lu. Me pare inposibie che nea so bontà infinita el possa condanare ‘na so creatura a sofrire cussì tanto e par tanto tenpo. Sensa speransa.
So d’acordo che xe giusto curarse quando no se sta ben, ghe mancaria anca quea. Ma quaeo xeo el confine tra el curarse pa guarire e l’acanirse anca quando saria mejo lassar morire in pase?
In conclusiòn, me pare che tegnendome in vita par forsa, i dotori no fassa ea voeontà del Signore ma quea dei omeni. Me piasaria proprio trovare qualcun che me spiegasse come funsiona sta facenda de insistare o no, e se si par quanto tenpo?

Ceronte