ANCA STO ANO SE RIVA’ NADAE

Me capita de ‘ndare spesso in centro durante ea setimana e se gò un fià de tempo me perdo via a vardare e vetrine. Beh! In sti giorni, anca uno che no savesse ne łesare ne scrivare el capisse che ghe xe calcossa de diverso pa l’aria. Tanta łuce pae strade, ma no soło dei lanpioni stradai, ghe xe tanti festoni de briantini e lucette, cascate de lustrini de tuti i cołori dentro e fora e boteghe. Parfin e comesse e pare più łustre. I àlbari i ga tute cołane de ciareti, de baete grande e picołe, bianche, rosse, zae, lucenti, che fa anca un bel vedare. Ma speta! Sicome de àlbari no ghe nemo tanti, in giro te ghe ne vedi de enormi, ma anca de picoi, che i fa vegnere no se sa da dove, basta che i sia abeti. Po ogni tanto spunta un ”omo vestio de rosso coea barba bianca”… sensa tirarla tanto łonga, vol dire che se avisina Nadae.
A parlavo proprio ieri co Bepi, de tanti ani fa quando jerimo toseti e Nadae voeva dire ‘ndare Messa de mesanote, magnare calcossa de più dei altri giorni ma soratuto ‘ndare pai fossi, drio i albari o pai campi in serca del mus-cio pa fare el “Presepio”.
E sì! Ea sodisfasíon più granda gera farlo ogni ano senpre più beo e man man che crescevino el deventava senpre più grando e più perfesionà. Coálche statueta in più, coálche piegoreta più bea, un ponteseo, un lagheto fato co un toco de specio, un fogheto finto co ‘na łanpadina rossa coerta de bachetei. Insoma gh’ea metevino tuta pa ‘vere un bel risultato. N’altra festosa abitudine gera ‘ndare pae Cese a visitare i Presepi pa fede, ma anca par copiare e fare più beo coéo che fasevino casa!
Co questo no vojo dire che gera mejo aeora, parché a mi ł’alegria e ła gioia me piase e no vedo gnente de małe festegiare el Nadae co canti e luci. Se vardemo ben el xe el giorno che nostro Signore se fa omo par salvarne. Più bea ocasiòn de questa pa fare festa no ghe n’é!
Serto ghe voe un limite a tuto. Bee ste vetrine piene de strafanti che costa tanti schei e pa ea magior parte no i serve a gnente, però…se te ghè da fare un “pensierin” a coalche persona te toca par forsa caminare e girare un pasto pa trovare ‘na robeta da spendare pocheto e fare bea figura.
Ma parché sia proprio un vero Nadae no bisogna desmentegarse de chi sta peso de noaltri. E purtropo ghe ne xe, no i se vede ma i xe tanti, de vissini e de łontani. Ałora serchemo de festegiare sto giorno fasendo anca qualche opera bona. So sicuro che dopo, ea feisità che sentiremo nel core sarà più bea e più granda.
Bon Nadae a tuti e voemose ben!

Ceronte