Le CASE A SCHIERA de na VOLTA

da Quatro Ciàcoe  di  M. Luisa Buso

Squasi tute le case del centro urbano antico gaveva na pìcola corte dadrìo.
E più la casa gera signorile… più grando gera l’interno.
No te fasevi dó trezento metri sensa èssare inondà dal profumo del verde.
La sità, un tenpo, la gera piena de sti capelini verdi e la gaveva del ritroso e del misterioso.

Presenpio: davanti a la me tratoria, in via Bartolomeo Cristofori, za “Borgese”, ghe gera un giardin che finiva in via Calfura; co un tòco i ga fato ‘na rimessa prima e dèsso un magazin.
Par la storia ze restà l’arco in piera che cornizava el porton in legno e la mureta che finisse tacà al numero oto.
Pensàndoghe ben, sento uncora el profumo de la “madre silva” che se ranpegava par la mura e el porton.

A quel tenpo có gera fati i peri, i tosi zugava a musseta par ‘ndarli a robare e se i gera crui, i ligava la boca, come fa i cachi, ma le vece de casa saveva ben come farli maurare in pressa.
Sti peri, adesso, i magnemo dopo sie-sete mesi de frigorifero, e, co quel gusto naturale te ghe ne trovi uno su sinque chili, se te si fortunà; par queo, bisognarìa tornare a la paja e ai granari e lassar decantare là sti doni de Dio.
Le case del “Borgese” le gera quasi tute a schiera co la corte in schina.

L’Istituto “Zannini”, dèsso “San Marco”, gaveva un giardin de platani, sarà da mura e, da i piani alti de la casa de i Boesso, se vedeva tuto, ma un poco anca passando.
Sicome i portoni de le case co tanti inquilini gera senpre verti, te vedevi, passando, le corte
inverdie de quee case: el giardin de i Boesso, de i Ferrari, de i Monteverde, el giardin de i Poleto co l’armeinaro e, via de dó-tre, tute gaveva el so galan de verde. Ma de tuto quel che ghe gera, no ze restà che el númaro oto.
La costrussion pareva ‘na nave fata a sete co tre baloi longhi venti metri, co un cesso ogni uno in fondo, a la turca, par tuti e in ogni piano viveva sinque fameje in càmara, cusina col fogolaro e un sgabussin.

E che Dio mandasse un fiolo o sinque, ‘ndazeva ben lo stesso. Sora ste case a schiera se vedeva el verde del giardin Treves che riva fin in via Beato Pelegrin, e dèsso le rame se senta sui copi; e se vedeva un tòco dei àlbari del palasso Maldura, al tenpo, sede de i Carabinieri.
Ne la gran corte del nùmaro oto, ghe gera par tuti i so inquilini un camaron par lavanderìa co terassa sora.
Cortegiando la me sità in bicicleta, serco qualche postesin verde che na volta m’incantava. E, pensando al balo “Molin del sogno”, in via Savonarola nei ani sinquanta, (dèsso garage) me so’ messa el core in paze.
I palassi de via Milano ga sconto un verde antico, streto nela noncuransa de sto tenpo che me lassa qua e là qualche penacieto verde testardo, par parlarghe de storia un giorno a un nostro nevodeto.
Par questo mi giro e vago a zonzo, vardando sempre in alto, sercando un qualche punto antico che possa andar ben anca dèsso, in sti tenpi moderni.

M. Luisa Buso

da Quatro Ciàcoe lo