Da ” VERSI INEDITI” de Camilo Nalin eccovi una poesia satirica intitolata :                                                                 ” La SORPRESA”.

Un certe Bortoleto Fureghin,

zovene, fresco,belo e cortesan,

sempre pulito come un calalin,

in cale de le spente a san Cassan,

l’ha visto una doneta sul balcon,

che ga fato nel cuor de l’impression.

 

Questa la se chiamava Ana Buseto

fia de Granelo capo de contrada,

a Marcantonio Anibale Corneto

da circa quattro mesi maridada

dona co un per de oci e una presenza

da far presto tirar la conseguenza.

 

E za al nostro galante Bortoleto

per quagie citadine cazzador,

dei pochi che in sti tempi tira dreto

cossa tanto essenzial per far l’amor,

capisce in conclusion che ze sior’Ana

de quele che ga al colo la campana.

 

Bravo del so mestier in su l’istante

el piano per sfogar la so passion

e con un biglietto tutto spasimante

ghe palesa i so afeti e l’intenzion;

Ela ,dona prudente e de buon cuor,

subito ghe risponde in sto tenor.

 

Sior Bortolo, el me creda, son sincera

mi me sento disposta a secondarlo

perchè no ze sto cuor fato de piera,

anzi sora al mio onor posso zurarlo,

a tuti chi go piasso sul momento

larghe prove go dà de sentimento.

 

Ma mio mario geloso a l’ecedenza

ze un ostacolo grande a superarse,

dunque el capisce  ben ghe vol prudenza,

e bisogna esser cauti a concertarse,

perchè se mai ghe dessimo sospeto

el ne faria andar sbuso ogni progeto.

 

Femo cussì, doman su l’imbrunir,

un poco avanti el tiro del canon

soto le mie finestre el pol vegnir,

che mi starò aspetando sul balcon,

e quando  mio mario secondo l’uso

va a consegiar lu vegnarà dessuso.

 

Il seguito della storia alla prossima puntata…………..