Continuo la lettura della poesia satirica “La Sorpresa”, tratta dai” Versi Inediti” di Camilo Nalin .
I resta cussi intesi,e ‘l zorno drio
verso sera l’amigo gera là.
Fora de casa in pressa va el mario
e malapena lu ze entà,
core dessù dove el so ben vedendo
el sente che l’amor ghe va crescendo.
Mezz’oreta a rigor gera passada,
fra una cossa e l’altra, quando i sente
averzerse la porta de la strada
e vegner su el mario che destramente
l’avocato de sesto Ercole Arcasa
l’aveva consegià tornar a casa.
A sto passo scabroso ve premeto
che in un certo retrò piutosto scuro,
arente de la camera da leto,
se trovava un relogio pusà al muro,
de quei fati a casseta, che se usava
co mia bisnona el nono la latava.
Sconcertà sul più belo da Corneto,
fra la fufa, la rabia, e fra l’imbrogio
se rifugia l’amante povareto
senza pensarghe su drento el relogio
per no esponer l’onor de sior’Aneta
e cercar che ‘l mario no ghe le peta.
Ela po, dona franca de natura,
che bon uso sa far de la prudenza
mostrava co un esempio de bravura
un’aria de decisa indiferenza,
a grado che qualunque certamente
gavarave zurà che l’è inocente,
ma so mario al contrario persuaso
che l’avocato sia una copa doro
un omo che ghe vede, e che ga naso
in ogni afar dificile de foro,
ne andava gnente afato dubitando
che in casa no ghe fusse ‘l contrabando.
Come un can de tartufole l’usmava
col velen su la boca in ogni sito,
e sarache magiuscole el tirava
per catar fora el corpo del delito,
zurando che ‘l voleva de l’ afronto
farsene su l’istante render conto.
L’entra in retrò, nè ‘l savaria pensà
forsi drento el relogio de vardar,
ma sicome al merloto ga tocà
el pendolo col c… de fermar,
e i pesi fra le man de rancurarse
per poder a là megio colocarse,
cussì sta cossa à generà l’efeto
che apena Marcantonio se n’à acorto
ghe se venudo caspita sospeto
che sconto in tel relogio fusse ‘ l morto
e co intenzion de far fiera vendeta
spalanca tuto a un trato la casseta.
La storia continua………….