P8220183 Hello boy!
– Ma come parlito Bepi. Sito drio deventare mato.
– No te ghè miga capio? Te go sałudà in inglese.
– Speta che varda in giro, no semo più a Brusegana de Padova?
– Ma dai! Serto che sì, però vuto metare se te parli con qualchedun e te ghe meti dentro ogni tanto na paroeta in foresto, te fè na figura che no te ghè gnanca idea.
– Te digo mi che figura che fasso, quea del mona par no dire de pezo. Scusa seto, ma se proprio te ghe tien, almanco disi e paroe giuste. Mi no son “boy” da tanti ani, semai “man”.
– Ma aeora te sè anca cossa vol dire “gossip”, “liaison”, “glamour”, “privacy”, ecc. e po “veline”, “escort”. Tute paroe che mi sento par teevision, me łe segno e inparo. Te dovarissi dopararle anca ti, pa modernisarte un fià!
– E secondo ti, metendo qua e eà na paroeta in foresto, inglese, fransese o altro, vol dire che so moderno? Meti el caso che te trovi un inglese vero che te ga sentio, el te fà un discorso nea so lengua, te resti con ea boca da pomi parché no te ghè capio gnente e no te sè come rispondare. Te piase l’inglese? Te’o studi e te’o parli co chi che te capisse. Dopo, voendo, te ve in piassa del Santo te ’scolti i turisti e co łori te poi ciacoeare e magari te ghe spieghi e beesse dea ciesa e…se el Santo te iuta, te poi anca ciaparte un franco! Po ste paroe che te fà tanta inpression e ga el corispondente in diaeto, aeora doparemo e nostre. Par farte qualche esenpio su quee più in voga: “gossip” saria e ciacoe, i petegoessi so corni o altri scandai del genare. Vedito quanto poco fina xe ea verità se’a xe dita co paroe che se capisse. “Liaison” vol dire parlare de do che sta insieme ma no i xe marìo e mujere, do amanti insoma. ’Speta, “glamour” se poi intendare come el fassino, el prestigio de na persona, più o meno atraente. E po “escort” che no xe né inglese né francese, ma serve par quersare serte schifesse, el corispondente in diaeto te’o sè za. ’Desso, sito uncora convinto de fare bea figura, co sto sfogio de sapiensa che te credi de’vere?
– Forse te ghè rason. Cossa vuto mai, mi so un omo senplice e me sentivo un fià inportante parlando cussì. Del resto eo fà quasi tuti….
– Xe proprio queo el difeto dei nostri tenpi, basta che uno scominsia co’na paroea che fà colpo e tuti ea dopara par far vedare che i xe moderni, anca se no i ga capio gnente del significato. Vuto n’altro esenpio: serte paroe ognuno e dise a modo suo. Ciapa una de quee che se sente più spesso: “privacy”, ghe xe chi pronuncia “praivasi” altri dise “privaci” o “privasi”. Mi credo che se te disi riservatessa te vè tranquio che te capisse tuti!
Purtropo caro Bepi so na roba go dovudo arendarme anca mi: el computer. Non so se i o ga fato ’posta par far dispeto ai veci, ma se no te inpari un poco de inglese te si fregà parché el ghe entra dapartuto. No provo gnanca farte qualche esenpio parché a scrivarlo vegnaria fora serti spropositi da vargognarse.

Ceronte