EÀ ME RICHESSA
Vardo sta caterva de libri che go davanti,
cussì sentà sensa far gnente,
penso al passà e me digo:
Se gavesse conprà vestiti
saria senpre mi, ma i se gavaria fruà
e saria inutie vantarse de na roba
che più de tanto no eà gavaria durà.
Invesse i me libri xe uncora qua.
Dee volte ne tiro zo qualchedun che me xe tacà
Smincio, lezo qualche pagina e se eà me va ben
me ricordo un fià come ea gera andà.
Ma el più dee volte no me dise gnente
parchè co te perdi eà memoria
no te poi farghe gnente.
Pa fortuna, co l’età me xe vegnù
na facia tosta che no gero mai stà
e con un foglio bianco tacà
buto zo queo che me vien in mente,
na s-cianta de ricordi, el resto inventà.
No se ciapa un franco de gnente
ma quanti amissi che me go trovà,
magari no me ricordo el nome,
ma i go tuti dentro come na foto stanpà
e so sicuro che lori me capirà.
Questa xe eà più bea richessa
che me xe restà.
Ceronte
(Aprile 2017)