CUSSI’ TANTO PA RIDARE

Che pecà!

Eà go vista poco fa

no eà me pareva cambià

ma soto vento via

go capio che no eà gera più mia.

Eà gera tuta trucà

co boca e oci incornisà

no eà gaveva più eà beessa

che gavevo sempre adorà.

Chissà co chi eà sarà ‘ndà

forse uno dea compagnia passà,

ma in fondo che importansa ga

sercare paroe adatà.

Digo soło: che pecà,

ch’eà sia proprio ‘ndà

fora dei pie de chi ea gaveva amà.

Serto te ste tanto małe

da butarte in canałe.

Pa fortuna a na serta età

co tuto queo che te xe capità

anche e disgrassie e vien superà,

te fe finta de gnente

e te speti ch’eà te passa daea mente.

Desso xe un toco che no eà sento

e dire eà verità so contento.

Vardando in giro ghe ne tante

de tose bee esuberante

e anca cambiare minestra

xe mejo che stare aea finestra.

Serto no te teà gavarissi spetà

dopo na vita sempre tacà

che un bel giorno eà te gavaria moeà.

Però a sto punto disemo eà verità

mejo essare łassà

che essare beco incornà.

Chissà se questa ze eà verità

o el sfogo de uno che xe stà busarà!?!

                               Ceronte

         (Maggio 2018)