BISOGNARIA PENSARGHE

Bisognaria pensarghe ben prima de dare giudissi soe persone.
Go asistio a ‘na seneta tra un padovan e un nero che me ga fato star mae e anca me ga fato fare un esame de cosiensa.
Ghe gera sto bianco so ea porta del so negosio che‘l mandava via in modo piutosto bruto e rabioso sto nero che’l gheva un poche de robe in man e che fassilmente gheva insistio un fià massa a voer vendarghe qualche cianfrusalia, ma in sostansa voeva un fià de carità pa magnare. Cussì, sensa voere, go sentio e ultime paroe dea discussiòn.
El bianco: – Ma parcossa no veto łavorare invesse de ronpare e scatoe (veramente lu el ga dito ‘na paroeassa) ae zente che ga da fare.
El nero: – Magari poter lavorare. Io cercare. Niente lavoro. Solo ofese. Mandato fuori dai piedi. Per me restare solo carità o rubare. Io no volio rubare. Io omo onesto. Io fame. Mia familia fame. Miei figli fame.
El bianco: – Aeora torna casa tua, chi xe che te ga ciamà? Mi no de sicuro. Gira, gira, basta, va via, fora dei pie.
El nero:- Africa casa mia tuta fame, omo bianco venuto portato lavoro, tanto lavoro, bono omo bianco portato tanto lavoro, noi lavoro ma niente soldi e poco mangiare, solo lavoro portato omo bianco bono, lui no lavoro tropo stanco, lui portato via oro, portato via petrolio, portato via alberi legno pressioso solo Africa, portato via tuto quelo che c’era de bono, a noi restato solo deserto e fame.
El bianco, uncora inrabià ma manco convinto de prima: – Podevi massarlo, difendarve, metarve tuti insieme e farlo scanpare, geri in tanti…
El nero: – Omo bianco bono, promesso lavoro e mangiare se anca noi boni, sa no suoi omini sparare so noi cativi e tante bote pa farli deventare boni.
El bianco, vardando anca mi: – Serto che pensandoghe ben, bisogna dire che i ghe na passà tante e i ga da stare tanto mae se i xe costreti łassare ea so tera, ea so casa, ea fameja e ‘ndare in giro pal mondo, no so cossa faria mi nee stesse condissiòn!
A sto punto, quasi vargognandose, el ga messo ea man in scarsea el ghe ga da qualche euro e dopo el ga sarà ea porta e chissà se dentro el garà pensà a sto poro cristian nero in giro pal mondo, maltratà e malvisto da tuti…
Mi no vojo far canbiare idea a chi łese però me piasaria che tuti ghe pensassimo un poco de più prima de dare giudissi, in fondo anca łori no i xe tuti uguali, ghe né de pezo e ghe né de mejo, de sicuro i deinquenti no va umiliarse e caminare tanto pa ciapare più paroe che schei.

Ceronte