Questa xe massa bea, bisogna che ve ła conta. Purtropo no ła xe farina del me saco parché ła go łeta su un Bołetin de notissie Dehoniane e ła go łiberamente adatà.
In un paesoto dea bassa-padana, coi tenpi che core, squasi tuti conpra a rate o a credito sercando de tirare ‘vanti sperando che riva tenpi mejo de questi.
Un giorno, so l’unico sgangherato albergheto del paese ‘riva un sior co intension de fermarse un pochi de giorni pa riposarse dei so afari! Pa far vedare che’l xe na persona par ben el mete 100 euro soea toła el domanda de ‘ndar vardare e stanse al piano de sora par seliare queła che ghe piase. El paron no ghe pare vero de vere un cliente, el ciapa i 100 euro el core pagare el debito che’l ga col becaro. El becaro tuto contento, coi 100 euro in man el va de corsa a pagare l’omo che ghe ga venduo el porseo, in fiducia. Ma no ła xe miga finia, parché ł’alevatore de porsei gheva da pagare ła spesa del casuin e cussì i 100 euro cambia de man un’altra volta. El casuin che’l gheva un fioło un fià dureto de conprendonio core dal profesore a pagarghe e ripetission. Co sti ciari de łuna anca el profesore gheva fato metare a posto ła dentiera a credito e cussì i 100 euro va finire dal cavadenti. El dentista che se ła passava un fià mejo dei altri, el gheva łassà anca łu da pagare na sałeta del’albergo che’l gheva fittà par tegnere na confarensa. Cussì el core dal paron del’albergo el ghe mete i schei soea toła el salda el conto.
In quea vien zo el sior che gera ‘ndà vedare e camare e dispiasuo de non ‘ver trovà gnanca una che ghe piase el se toe i 100 euro el sałuda el va via.
Sensa nessun imbrojo, tuti gheva saldà el so debito, i gera sensa schei come prima ma ‘desso tuti se sentiva un fià più otimisti e pronti a ‘frontare ea batalia pa inpenire ła pansa tuti i giorni. No ghe xe sta nesun truco, epure soło fasendo passare de man in man sto toco de carta da 100 se gheva scancełà tuto. Bah! Mi squasi squasi ghe ła mando a… Quatrovali chissà se sto sistema poe ‘iutarlo a risolvare el bilancio de sta pora Italia.!

2009 Ceronte