SPUNTA ‘NA NOVA GIORNADA

El pare un ciareto
el sołe a stà ora,
ma tra poco
el splendarà soea tera
e noaltri omini
bisogna che pensemo
dove sbatare el naso
stà nova giornada.
Qualchedun sorapensiero
sentirà l’amore
inpenirghe el core
e che vegnarà l’afano
pa inventarse strade nove
verso ea feisità,
che purtropo no ea
durarà par senpre.
Dei altri, ciapai
dae dificoltà dea vita,
i sentirà soratuto
e soferense e łe disgrassie
da afrontare tuti i giorni,
finchè no ghe pensarà
el destin a risolvare.

Altri, comossi,
i vardarà sol prà,
pien de briantini de aguasso,
un fioreto drio
versarse al caldin del sołe
e tuta ea natura
ciapare cołori e profumi.
Incantai, i alsarà i oci
verso l’alto
e i vedarà nuvołete in ceło
scomparire pianeto
al’orizonte infinio.
I sentirà
de amare el Signore
ea vita e el prossimo.
I vivarà tranquiłi
acetando el ben e el małe,
pregando co fede
coea pase nel core!

Ceronte

(marso 2012)