SAN VAENTIN
– Ciao Bepi, xe un bel toco che no se vedemo, dove geri ‘ndà scondarte?
– Tasi, tasi, ‘desso te conto ł’ultima. Ieri, dato che gera ‘na bea giornada de soe, me so dito, ciapo el bus e vago fare do passi in centro. ‘Desso vien el beo, seto chi che gò incontrà?
– No scominsiare co indovinei, dime ciaro e tondo cossà te xe capità.
– Gò incontrà quea famosa amiga, quea xovane che ga ‘pena festegià i setanta…!
– Ma disi ea verità, quea che par ti gera ea mejo de tute, ea più bea, bona, sinpatica e ….anca brava te disevi! Insoma quea che, aea to verde età de otantani e passa… , te ga fato perdare ea testa!!!
– Proprio quea e, caso raro, ea gera da soea. Me so dito, stavolta ghe semo, ora o mai più!!!! Cussì, co fare indafarente ghe vago tacà fasendo finta de no ‘verla vista! Ciao amica cara, che piassere ravedarse, squasi se scontremo, ghe digo ridendo; dove veto de beo cussì da soea? Te dispiase se te ‘conpagno? Sercavo de far finta de gnente ma dentro me sentivo tute e buee rabaltae. Ma si vien anca ti ea me dise soridendo, chissà che te meti ea testa a posto! No gò miga capio cossa che ea voesse dire, mi me pare de ‘vere uncora ‘bastansa sarveo e de ragionare puito. Ma sicome non voevo fare poemiche e no voevo perdare ł’ocasion de dirghe i me sentimenti, gò ciapà ea batuta come ‘na espression de afeto sconto. Sercavo de darghe el brasso pa sentirla più tacà, e anca pa farme corajo a scominsiare el discorso, ma gnanca farlo a posta ghe gera tanta de quea zente che gera quasi inposibie stare in copia. E cussì caminemo pianeto, ogni tanto do paroe tra un spenton e na schincaroea. A vegnarà che se fermemo un bel momento, pensavo, e magari se sentemo a bevare ‘na gazosa, e cussì tra ‘na ciacoea e n’altra serco de spiegarme, machè, pareva che andassimo a un’apuntamento. Infati…
– Infati, cossa?
– Gerimo davero drio ‘ndare a ‘na specie de apuntamento…Passemo el Canton del Gaeo e ciapemo via Roma. Ogni tanto ea me fa un soriseto, quasi de incoragiamento,
cussì finalmente riesso tacarme brasso, dato si che in quea zona no ghe gera tanta zente. Porta pasiensa ea me fa, ormai semo quasi ‘rivà e dopo se sentemo e te me conti tuto…Finalmente. Be’ vuto che te diga dove ea me ga portà?
– Tachemo da novo co indovinei?
– Scolta, gheto presente dove xe ea Cesa dei Servi? Be’ semo proprio ‘ndà dentro in ciesa, parchè ea gheva sentio dire, te se che sta amiga no ea xe padovana, che so sta ciesa se festegia san Valentin, protetore dei inamorati…e dei putei! Te ricordarè anca ti che da picoi i ne portava a farne benedire e dopo i ne dava na “ciaveta” de ricordo. A sto punto scominsiavo a ‘vere bone speranse, e gero pronto a dichiararme e invesse….a gerimo ‘ndà fin là parchè ea voeva portarghe casa ea ciaveta a so nevodeta. E mi gò dovuto contentarme de do baseti soe masee, co se ghemo saludai.
Ceronte