POARETO !
Ciò, gheto sentio de Nineto
el se gà montà el sarveo ….poareto!
da coando qualchedun ghe gà dito
che uno col so nome scrito,
gera amigo de Dante.
Ma qualo? queo importante?
Si proprio co queo, i se scriveva
in versi, cussì come i ghe vegneva,
da veci amissi fiorentini
i se mandava ramengo… sensa puntini,
i se dava da morti de fame,
de fredo, da imbroioni e da infame.
Aea fine i ‘ndava in qualche betoeta
torse in giro bevendo… e spentonare,
co gera ora de pagare.
Ze da dire che i gera mezi imparentà
par via de na zermana,
na serta Gema chel poeta gheva sposà.
Dopo un toco i se ga stufà de barufare
e ze ‘ndà vanti Dante da solo
chel ghe saveva più fare
e come ultimo sfotò
al’amigo che ghe piaseva sbafare,
el lo ga messo in purgatorio a penare
tra i morti de fame sensa magnare.
L’amigo che gà capio eà smacada,
ga pensà che gera mejo
darghe un tajo ae rime combinà,
darse na streta de man e’amicissia salvà.
Ma da aeora Nineto
crede che l’arte eà ’riva pa eredità
e cussì el se ga messo scrivare anca lu
de bona voeontà,
pensando al’antenato famoso
che pa primo ga scuminsià.
Mi, se go da dire eà verità,
ghe fasso tanti auguri
ma, poareto!…..el me fa anca pecà!
…s’el crede riciapare el viajo
chel so vecio-parente
gaveva moeà.
Rino Ceronte