GO  SEMPRE  FAME ! 

Mama mia che rabia.

Go sempre fame!

Te ghe voja

vardare in giro

sperando che te passa.

Gnente da fare,

ansi,

me ne vien anca de più.

No so cossa me xe capità.

Go sempre fame!

Vardo, giro, giro, vardo,

no me passa,

ła pare parfin na małatia.

No me gera mai tocà

na roba cussì.

Go provà bevarghe sora,

gnente!

Go cambià giro,

gnente!

Go cambià amissi,

gnente!

Go sempre fame!

Trovo Piero na sera,

vecio amigo de infansia

e ghe conto el me afano

par fio e par segno

e sensa rèchie.

El me varda

co do oci stravanii,

el me dise soltanto:

Vargognete!!!

 Aea to età

‘vere uncora fame…..

de serte robe passà!

                                     Ceronte  

                 (Primo de  aprie domiequatordese)