EL PRESEPIO
Qualche giorno fa, sarà passà un mese, go visto un sior vestio puito con un bel fare chel se vardava un tocheto de tera, na roba da gnente, vista da distante. A go spetà che’l ‘ndasse via e come na femeneta da poco, a me vargogno dirlo, ma so ‘ndà vardare cossa ghe gera so sto canton, de cussì importante. Robe da mati, ghe gera soɫo un bel quadratin de mus-cio. Proprio mus-cio. Me so girà spoetisà, ma varda se uno de na serta età se perde drio na s-cianta de mus-cio. Ze passà un fià de tempo, se ga rinfrescà l’aria e me pareva che anca eà zente fusse deventà più bona e ben disposta al soriso. Me go da na manada in fronte e me so ricordà che gerimo soto Nadae e ogni cristian ghe tien a prepararse co l’anema neta eà pansa pronta pa festegiare stà festa con fraterno amore. No ghe ze altre feste come Nadae che ogni cristian no eò passa in famegia co qualche orasion . …. magnare calcossa de bon e finire col paneton, in fondo aea sala no manca mai el Presepio pa completare eà recorensa. Eco risolto el mistero del sior che se vardava el mus-cio e me ze vegnù in mente che anca noaltri toseti, nei ani passà ‘ndavino sercarlo drio i fossi e questo previdente el lo gheva trovà par tempo, pa completare eà scena dea nascita del fio del Padre Eterno. No ghe ze na regoeƚa pa farlo, ghe ze queo che copia da qualche pitura de na volta, qualche altro fa na scena come dentro na staea co qualche bestia domestega, come na vaca e un musso che pare che scalda un fià l’aria. Altri i lo fa come in te na grota coea neve che vien zo e te vien i brividi anca vardarlo, altri uncora i lo fa tra fiori e piante che pare che semo in primavera, eco dove ze ‘ndà finire el mus-cio. Po dopo, anca i altri de casa voe zontarghe calcossa, cussì uno ghe mete nà vissina che ghe porta un vestitin, n’altra ghe porta calcossa de caldo paea mamina, n’altro ghe mete un pastore coe piegore che passava de eà. Pa finire anca el Presepio iuta a fare festa granda in bea compagnia e amore, paea nassita del Salvadore.
(Novembre 2018) Ceronte