EL CAFE’ SOSPESO

Questa no ea ghevo mai sentia. Proprio ieri go łeto su un libro* ea trovata del cafè “so-speso”.
Pare che a Napoi ghe sia, o ghe fusse, sta sinpatica e vołontaria usansa. Uno ‘ndava al bar e ordinava do café “uno sospeso”. Sto sior, se poe dire sens’altro generoso, se be-veva el so café, ne pagava do e uno restava “sospeso”. Cossa voeva dire sta paroeta. Senplicemente che se nel corso dea giornada qualche porocan passava par là el do-mandava se ghe gera un café sospeso, se ea risposta gera sì, entrava el se ło beveva e co tanti sałuti el ‘ndava via. Naturalmente ghe sarà sta anca i furbi che sfrutava ł’ocasion e i se beveva el café anca se i gaveva i schei pa pagarseo. Ma no xe questo queo che vojo farve osservare, ma queo che’l me ga fato pensare e cioè che beo che sa-ria se trasferissimo sta dolse abitudine sol canpo dea carità cristiana. In poche paroe se qualche matina te passi davanti ‘na Ciesa, te entri e devotamente te disi 2 Ave Maria “una sospesa” te ea doni co tuto el core a uno che no te conossi, che no te ringrassiarà mai, che ‘l ga finio e so preghiere e anca ea speransa, ma che’l ga uncora tanto bisogno. Eco, co sto picoło ato de generosità te ghe dè un poca de consolasiòn a un’anema e te ghe ricordi aea Madona de dare un’ociada a sto fradeo in Cristo che sofre uncora tanto.

Ceronte

* A. Maltarello: Per continuare a sperare.